Žnjenska króna a žnjenski wěnc

Lětsa běše Žitawa město, w kotrymž wotmě so Sakska krajna domchowanka. Tuž dachmy so do dźěła, zo bychmy so znowa z krónu a wěncom na wubědźowanju wo najrjeńšu žnjensku krónu a najrjeńši žnjenski wěnc Sakskeje wobdźělili. Wot 10. awgusta přichwata kóždu wutoru a srjedu něhdźe 20 pilnych pomocnikow do něhdyšeho gmejnskeho zarjada,  zo bychu kłosy rjedźili, přitřihali a do kwěćelkow wjazali. Kónc septembra bě dźěło zdokonjane a mějachmy nowu krónu a nowy wěnc.

Króna pyšeše njedźelu, 23. septembra, na domchowance wołtarnišćo cyrkwje. Tute běchu zaso žony našeho towarstwa z płodami ze zahrodow, z pola a łuki rjenje wupyšili.

Wubědźowanje wo „Najrjeńšu žnjensku krónu a najrjeńši žnjenski wěnc Sakskeje“ wotmě so potom wot 27. septembra hač do 2. oktobra w cyrkwi swjateho Jana w Žitawje. A naša próca je so wudaniła:  mjeztym k 6. razej wobsadźichmy z našej krónu 1. městno. Tež při online-wothłosowanju, štož bě lětsa nowostka, dósta naša króna najwjace hłosow. Lětsa bě jara wjele eksponatow, z toho wosebje wjele wěncow.

Je z wašnjom, zo njese so po njedźelnej ekumeniskej swjatočnosći dobyćerska króna z cyrkwje, zo by so na wóz (lětsa bě to konjacy zapřah) za swjedźenski ćah stajiła. K prěnjemu razej njeseštej na nastork jednaćelki Sakskeho zwjazka žonow na kraju z. t. čłonce našeho towarstwa Marija a Ludmila w serbskej wuslěkanej drasće krónu a před nimaj mała Johana, tohorunja w narodnej drasće. Jara rjany to wobraz w połnje wobsadźenej cyrkwi.

Lětnje so wotměwace wubědźowanje wo "Najrjeńšu žnjensku krónu a Najrjeńši žnjenski wěnc Sakskeje" zarjaduje so wot Sakskeho statneho ministerstwa za regionalne wuwiće (SMR). Sakski zwjazk žonow na kraju z. t. ma nadawk, wubědźowanje organizować a přewjesć. wjace »