Wulět do Błótow – dźiwadłowa čołmowa jězba w raju bajow

Najebać sylneho dešća, kiž pola někotrehožkuli samo strach před powodźenjom zbudźi, podachmy so zhromadnje ze župu „Michał Hórnik“ sobotu, 17. julija 2021, na wulět do Błótow. Do Kuparskich Bórkowow dojěłši, witaše nas rjany miły lěćny wječor.

Tak běchmy połni wočakowanja a wjeselachmy so na dźiwadłowu čołmowu jězbu w raju bajow. Na wjacorych městnach při brjoze zetkachmy figury ze serbskeho powěsćoweho swěta kaž wódneho muža, lutki, błudnički a připołdnicu. Woni spěwachu a powědachu nam swoje žortne a napjate stawiznički.

Z hodźinskeje zabawneje jězby so nawróćiwši, dachmy sej słódnu wječer zesłodźeć. Přizamkny so kulturny program ze skupinu Kula Bula » a rejemi na łuce.

Snano chceće sej ze swójbnymi abo přećelemi hišće raz tam dojěć: www.gruene-ecke-spreewald.de